10/09/2007 - 8:00 h

El 8 de setiembre siempre espierta sensaciones y reflexones diferentes dependiendo de l’actitú cola que miremos a esta tierra, y sobre too, según el futuru, que queremos pal nuestru país. Dende la perspectiva sucursalista y provinciana asitiada en gran parte de la clas política asturiana ye un día más nel que reafirmar una concepción dependiente y autocomplaciente del país, mientres que pa les persones que consideramos qu’Asturies ye’l nuestru marcu de referencia nel mundu, ye un día reivindicativu, nel que reafirmamos el nuestru compromisu con una visión dende la que ye posible ser asturianos y asturianes ensin renunciar a la nuestra cultura, a la nuestra historia y a la nuestra capacidá de gobernanos de forma soberana acordies colos nuestros intereses.

Pero amás el Día de la Nación Asturiana d’anguaño ya tamién l’antoxana a un cursu políticu onde vamos vivir, amás d’unes elecciones xenerales, dos fechos d’ importancia pergrande dende’l puntu de vista políticu y simbólicu; la más que posible reforma del estatutu asturianu y la coincidencia, en 2008 de los dos sieglos de la declaración de soberanía de la Xunta Xeneral del Principáu.

Igual qu’hai unos díes celebrábense los 70 años de la declaración de soberanía del Conseyu Soberanu d’Asturies y Lleón, decisión de circunstancies nun momentu críticu de llucha contra’l facismu nel que volvió a espeyase el determín d’Asturies de gobernase a ella mesma, en 1808 la Xunta Xeneral del Principáu, cola ayuda de la presión popular, tomó’l mandu d’Asturies exerciendo la soberanía sobre’l so territoriu y declarando la guerra pela so cuenta a les tropes franceses de Napoléon que taben acabantes d’invadir la península. Ye difícil identificase anguaño con dellos de los valores que movieron y motivaron aquel llevantamientu, pero nun podemos escaecer qu’ente aquelles persones hubo dellos asturianos con idees lliberales que tuvieron nel aniciu del pensamientu republicanu y demócrata.

Con estos fechos históricos Asturies volvió amosar de forma esplícita que ye una entidá con personalidá histórica, cultural, economica y social propia. Pero nun hai dulda de qu’esta parte d’afirmación y defensa de la nuestra soberanía nun ye daqué qu’a los partíos mayoritarios y estatales los faiga sentise a gustu y de xuru que nes celebraciones oficiales vamos ver una versión descafeinada de lo que n’otros países constiyuiría un motivu de xuntura y un exerciciu d’afirmación de la identidá. Nun tenemos que ver más que l’espíritu col qu’aborden la cuestión de la reforma del estatutu estos partíos; unos a la busca d’un estatutu delgáu, ensin ases pa garralu con fuercia, p’asina nun tener qu’enfrentase de verdá a la xestión d’un futuru que requier un cambiu de paradigma económicu, cultural y social, y otros, asonsañando la defensa d’unos derechos nacionales pa depués dexalos na cuneta cuando l’hermanu mayor llama a xugar al patiu.

Asina queda la sensación de qu’otra vegada va pesar más, non el reflexu d’esa imaxe qu’Asturies asoleyó en 1808 o 1937, sinón la concepción del país como vagón de cola, la de la renuncia a lo que nos correspuende; la mesma que llevó en 1979 a que s’escoyera la vía del artículu 143, la llamada vía lenta, pa desenvolver l’estatutu d’Asturies; l’espíritu que volvió a tar presente en 1999, cuando se reformó l’estatutu dexando, por exemplu, a la llingua asturiana ensin la oficialidá.

Asina llegamos a esti 2007, nel que n’otros países del estáu tomen posiciones afitando les sos realidaes nacionales y nós atopámonos con una clas política dimpuesta a cayer nes mesmos errores. Pero los y les qu’apostamos pol proyectu políticu d’UNIDÁ tamos convencíos de qu’esta situación y los partíos políticos que carecemos nun son xenéticos, pueden cambiase, y dende la izquierda nacionalista podemos y tenemos qu’influyir nel futuru d’esti país. Hai que volver a dicilo, de manera positiva y con consecuencies polítiques, tenemos que garrar les riendes como esti país lo fixo en dellos momentos históricos, y por eso dicimos SÍ a Asturies y reafirmamos qu’Asturies SÍ ye una nación, porque esa ye la meyor forma d’enfrentanos a la concepción que nun nos dexa ser dueños del nuestru futuru. La sociedá asturiana ta preparada pa un discursu maduru y responsable, que tenga a Asturies y lo asturianu como aliaos, n’UNIDÁ tamos por ello, y queremos abrinos p’ atopar la complicidá de la nuesa xente.